After the Burial með nýtt lag og nýja plötu

Bandaríska hljómsveitin After the Burial sendir frá sér nýja plötu að nafni Evergreen 10. apríl næstkomandi, en það er Sumerian Records útgáfan sem gefur út efni sveitarinnar. Þetta er fyrsta plata sveitarinnar án bassaleikarans einn af upphafsmönnum sveitarinnar Lerichard “Lee” Foral.

Nýtt lag með Sacred Reich

Bandaríska hljómsveitin Sacred Reich sendir frá sér nýja breiðskífu í sumar að nafni Awakening, en það er Metal Blade Records útgáfan sem gefur út efni sveitarinnar. Hljómsveitin mun gera betur en það, því einnig er von á spilt plötu með Sacred Reich og Iron Regan 19. apríl næstkomandi. Lagið á á split plötunni “Don’t Do It Donnie” er nú í boði á youtube (og hér að neðan). Umrædd skífa verður aðeins gefin út í 1000 eintökum.

Nýja platan “Awakening” var tekin upp af Arthur Rizk, en hann hefur meðal annars unnið Cavalera Conspiracy, Power Trip og Code Orange. Þetta er fyrsta breiðskífa sveitarinnar síðan árið 1996 þegar sveitin gaf út plötuna Heal, en þá var í sveitinni trommarinn Dave McClain, sem síðar gekk til liðs við sveitina Machine Head. Nú er Dave aftur genginn til liðs við sveitina og sveitin tilbúin með nýja plötu og nýja orku.

Hægt er að hlusta á umrætt lag hér að neðan:

Hrottapönkbandið Spünk kynnir nýtt myndband: INCESTFEST

Hrottapönkbandið Spünk var að gefa út myndband við lagið incestfest og er því við hæfi að kynnast bandinu nánar og sjá hvað er í rauninni í gangi í herbúðum sveitarinnar.

Segið mér aðeins um bandið, hvernig band er þetta hvernig tónlist spilið þið og hvaðan komið þið?
Erum í raun lítið annað en fjögur saurlifuð afsprengi hrottalegs gjálífs og freistinga, vorum allir getnir á sama ættarmótinu. Við reynum þó alltaf að koma vel fyrir og sýna náunganum virðingu. Hvað tónlistina varðar er hún bara keyrsla sem má aldrei stoppa. Ekkert kjaftæði.

Hverjir eru í bandinu?
Skari Biscotti, söngur
Andrés Biscotti, gítar/söngur
Þorsteinn Biscotti, bassi
Óttar Biscotti, trommur

Nafnið Spünk, hvaðan kemur það?
Spünk er auðvitað einlægasti líkamsvessinn og táknar fyrir okkur Kjark.
Nafnið kom á undan hljómsveitinni, svona eins og sæði kemur alltaf à undan barni. Èg hringdi í besta vin minn og spürði hvort að hann vildi stofna með mér Spünk og spila pönk. Bollurnar yfir Ü-inu eru einfaldlega tilkomnarvegna þess að við hlustuðum of mikið á Mötley Crue og Motörhead í æsku og drukkum of mikinn Löwenbrau.

Hvað hefur sveitin gefið út til þessa (og er eitthvað annað væntanlegt)?
Fyrsta platan okkar, Barnalög, er í þessum töluðu orðum í masteringu og stefnum við á að droppa henni í vor.

Hvenær eru næstu tónleikar? (Bravó giggið)
Föstudaginn 29.mars komum við fram á Bravó ásamt Hardcore Laxness, Korter í flog og Godchilla. Dj Eldflaug leikur svo fyrir dansi eftir tónleikana.
Nánari upplýsingar hér:
https://www.facebook.com/events/2094018494057340/?ti=cl

Eigið þið ykkur drauma gigg hér á landi?
Spünk og Sinfó

Hvað er svo næst á dagskrá hjá ykkur?
Frumburðurinn Barnalög er á leiðinni með tilheyrandi pompi, prakt og trufluðum útgáfutónleikum. Svo ætlum við að vera duglegir við að gigga í sumar.

Eitthvað til að bæta við?
Fylgist með á:
www.facebook.com/spunkmyshit
Instagram: spunksson
Youtube: Spünk Spünksson

Umrætt myndband sveitarinnar má sjá hér:

Opnað fyrir skráningu í Wacken Metal Battle 2019

HVAÐA SVEIT VERÐUR FULLTRÚI ÍSLANDS Á WACKEN OPEN AIR Í SUMAR?

– Opnað hefur verið fyrir skráningu í Wacken Metal Battle 2019. 
– Umsóknarfrestur er til og með 3. apríl 2019!
– Keppnin haldin 11. maí á Húrra – Sérstakir gestir: Une Misère 

Tónlistarhátíðina WACKEN OPEN AIR í Norður-Þýskalandi þarf varla lengur að kynna fyrir íslenskum rokkurum enda er hátíðin ein sú stærsta og virtasta í þungarokkinu.

Á hverju ári stendur Wacken fyrir hljómsveitakeppninni W:O:A METAL BATTLE og verður hún haldin í níunda sinn á Íslandi í ár. 6 sveitir keppa um stóra hnossið: Að komast á Wacken Open Air að spila og taka þátt í lokakeppninni þar sem til margs er að vinna.

Var það sveitin Une Misère sem sigraði í íslensku undankeppninni síðast og fór því út til Wacken fyrir Íslands hönd þar sem hún hafnaði hvorki meira né minna en í 4. sæti! Var það í annað árið í röð sem Ísland lenti í topp 5 í keppninni en árið á undan landaði sveitin Auðn 3. sætinu. Frábær árangur það og gríðarleg kynning fyrir íslenska tónlist eins og sjá má meðal annars í þessu innslagi sem birtist í sjónvarpsþættinum PopXport á þýsku stöðinniDW (Deutche Welle) í fyrra: 



Það er ekki ofsögum sagt að Wacken setur gríðarlegt púður í þessa keppni. Keppnin hefur verið haldin síðan 2004 og opnar hátíðin tónleikasvæðið sitt alveg degi áður en annað markvert byrjar á henni og hleypur að 30 alls óþekktum sveitum sem eru ekki með útgáfusamning að hátíðinni. Hún býður stóði af alls konar bransaliði til að fylgjast með keppninni og hljómsveitunum og gefur sveitunum fullkomið tækifæri til þess að koma sér á framfæri. Svona lagað er fordæmalaust á öðrum tónlistarhátíðum af þessari stærðargráðu.

Une Misère nýttu sér þetta til fulls þegar þeir lönduðu bókunarsamningi við Doomstar Bookings, sem Wacken bauð einmitt til að fylgjast með keppninni. Í kjölfarið lönduðu þeir svo útgáfusamningi við stærsta óháða þungarokkslabel heims, Nuclear Blast Records og hafa spilað á fjöldanum öllum af tónleikum síðan á erlendri grundu, m.a Roadburn Festival og Eurosonic í Hollandi og munu í sumar spila á m.a. Summer Breeze hátíðinni í Þýskalandi og Metal Days í Slóveníu. Mun Une Misère loka kvöldinu af sinni alkunnru snilld og taka fullt sett. 

Er ljóst að hér verður öllu tjaldað til. Viðburðinn hefur verið með flottari viðburðum í þungarokkinu á klakanum síðustu ár en reynslan sýnir að þátttökusveitirnar eiga sín allra bestu gigg í þessari keppni, enda mikið í húfi.

Skilyrði til þátttöku og hvernig maður sækir um má finna á www.facebook.com/WackenMetalBattleIceland

Farið verður vandlega yfir umsóknir og mun sérstök nefnd velja 6 sveitir til að keppa. Það gildir því EKKI fyrstur kemur fyrstur fær, heldur gæði! Því eru sveitir hvattar til að vanda vel til umsókna, skila tónlist í góðum gæðum o. þ.h.

Svartidauði – Útgáfutónleikar Revelations of the Red Sword

Svartidauði er ein stærsta þungarokkssveit landsins, en sveitin kom íslenskum öfgamálmi á kortið með útgáfu Flesh Cathedral sem hefur rutt brautina fyrir bylgju íslenskra svartmálmssveita sem hafa vakið mikla athygli undanfarin ár. Í kjölfarið hefur Svartidauði spilað ötullega um alla Evrópu undanfarin ár.

Á dögunum kom út önnur plata sveitarinnar, Revelations of the Red Sword, en henni hafði verið beðið eftir með mikilli eftirvæntingu eftir velgengni fyrstu plötu sveitarinnar Flesh Cathedral sem er álitin költ klassík innan stefnunnar. Viðtökur við Revelations of the Red Sword hafa verið afar góðar og þykir hún gefa forvera sínum ekkert eftir.

Svartidauði mun leggja upp í Evróputúr í maí auk frekara tónleikahalds á erlendri grund, en fyrst vill sveitin fagna útgáfunni með sjaldséðum tónleikum á heimavelli. Þátt taka í hátíðarhöldum hinir sérlegu gestir Nornahetta og Almyrkvi, en Almyrkvi mun einnig vera Svartadauða til halds og traust á komandi Evróputúr.

Dæmi um dóma sem Revelations of the Red Sword hefur hlotið í tónlistarmiðlum:

6/7 Metal Hammer
9.5/10 DEAF FOREVER
9/10 Rock Hard
9/10 Distorted Sound Magazine
8/10 Close-Up Magazine (Album of the month)
9/10 Ave Noctum
9/10 Via Omega Underground
6/6 Scream Magazine
A+/A- Indy Metal Vault
8.5/10 PureGrainAudio.com
8/10 metal.de
9/10 Powermetal.de
“The 20 best metal albums of 2018” – The Quietus

SVARTIDAUÐI
ALMYRKVI
NORNAHETTA

15. FEBRÚAR Á HÚRRA
2000 KR INN – HÚSIÐ OPNAR KL 20.00

ENGIN FORSALA
Miðaverði er stillt í hóf, en einungis kostar 2000 kr inn.

Húsið opnar 20:00 og tónleikarnir hefjast 21:00.

Daddy Issues með nýja útgáfu af laginu Bolurinn

Íslenska rokksveitin Daddy Issues, sem sendi frá sér smáplötuna Engan Asa í fyrra, hefur nú sent frá sér nýja útgáfu af laginu BOLURINN, en upprunalega útgáfan var gefin út 16. febrúar árið 2013 (nýja útgáfan var gefin út 6 árum síðar, eða 12. janúar). Hér að neðan má heyra báðar útgáfurnar:

Bolurinn – Gamla útgáfan:

Bolurinn – Nýja útgáfan:

Une Misère hjá Nuclear Blast útgáfunni.

Íslenska rokksveitin Une Misère hefur skrifað undir útgáfusamning við Nuclear Blast útgáfuna og í tilefni undirskriftarinnar sent frá sér mynband við lagið Damages, en ný breiðskífa frá sveitinni er væntanleg seinna á árinu.

Rotting Out með nýtt lag

Bandaríska harðkjarnasveitin Rotting Out kom saman á ný snemma á seinasta ári og kom meðal annars fram á Sound And Fury og This is Hardcore hátíðunum. Sveitin hefur tekið upp nýtt efni og kynna nýtt lag að nafni Reaper, en myndband við lagið má sjá hér að neðan:

Dangerface með nýja plötu

Norska pönk sveitin Dangerface sendir frá sér nýja plötu “Get Loud” 1. febrúar næstkomandi, en platan verður gefin út af Big Day Records útgáfunni. Hægt er að hlusta á nýtt lag með sveitinni hér að neðan, en um lagið hefur sveitin þetta að segja á bandcamp heimasíðu sinni:

Lyrically, the song Let It Burn is a quasi-political song, where everything we hear about today, “fake news”, “alternative truth” and other misery, is wrapped up in a musical package of delicious hardocre and punk. It’s difficult to not be affected by the things happening in the world today, so why not just let it all burn down to the ground. And we’ll all keep warm…

Birgir Jónsson trommari hættir í Dimmu

Trommari hljómsveitarinnar Dimmu sendi frá sér tilkynningu í dag þar sem hann segir frá því að hann sé hættur í sveitinni og um leið þakkar meðlimum sveitarinnar fyrir skemmtilegan tíma og rosalega lífreynslu. Hér að neðan má sjá tilkynningu hans í heild sinni:

Eftir tæp 8 ár sem meðlimur í þungarokksveitinni DIMMA hef ég tilkynnt félögum mínum að ég vilji ganga af sviðinu og hætta í sveitinni.
Fyrir því eru margar ástæður en aðallega sú að ég vil nota tímann minn í aðra hluti og finnst þetta ekki lengur eins skemmtilegt og gefandi og áður.
Samhliða Dimmu hef ég starfað sem stjórnandi í ýmsum fyrirtækjum sem og í eigin verkefnum og nú vil ég auka fókusinn á þann hluta lífs míns auk þess að hafa meiri tíma til að eyða með fjölskyldu og vinum.
Næstum allur minn tími hefur farið í þessa hljómsveit síðustu ár og því hef ég ekki haft nógu mikinn tíma til að setja í annað, það er t.d. lítið um sumarfrí með fjölskyldunni eða ferðalög þegar maður er að spila flestar helgar eins og raunin hefur verið hjá Dimmu síðustu árin.
Þetta hefur verið rosaleg keyrsla en nú er ég einfaldlega búinn að fá nóg og vil gera aðra hluti í lífinu. Um leið og manni finnst þetta ekki lengur gaman og fórnin of mikil þá á maður að hætta og þakka fyrir sig.
Það sem byrjaði sem saklaust ferðalag hjá mér í hobbí rokksveit snemma árs 2011 varð að
þvílíkri rússíbanareið þar sem við náðum árangri sem okkur grunaði ekki að væri mögulegur. Ég get ekki talið upp alla þessa hundruði tónleika og þær plötur sem við höfum gert en ég veit bara að við höfum gert flest allt sem hægt er að gera í tónlist í þessu landi…og það nokkrum sinnum.
Ég er samt alls ekki hættur að spila á trommur, öðru nær, ég er með nokkur spennandi verkefni í gangi með flottum tónlistarmönnum sem ég er spenntur að vinna í, þannig að ég mun halda áfram að gera tónlist. En ég vil velja verkefnin vel og nota tíma minn sem best.
Ég vil þakka öllu fallega fólkinu sem ég hef hitt í gegnum Dimmu, öllu fólkinu sem hefur sagt mér hvaða þýðingu tónlistin okkar hefur fyrir það , öllu liðinu sem hefur komið á tónleika hjá okkur, öllum tæknimönnunum og sérstaklega okkar elsku Big Bad Mama (Helga Dóra).
Þetta hefur verið alveg ótrúlega skemmtilegur tími og ég er rosalega þakklátur fyrir þessa lífsreynslu.
Að lokum vil ég þakka bræðrum mínum í bandinu, Silli, Ingo og Stefán – takk fyrir mig elsku vinir og
gangi ykkur vel – djöfull var gaman!
Takk
Biggi
Ps. Engar áhyggjur, þeir ætla að halda áfram svo að Dimmulestin stöðvast ekki, sem betur fer.

Orðsending frá Dimmu fylgdi svo fljótt á eftir:

Orðsending frá vopnabróður okkar honum Birgi “Nashyrningi” Jónssyni.
Við þökkum honum samfylgdina, gleðistundirnar og þátttöku hans í að gera DIMMU af því sem hún er í dag.
Við elskum þig kæri bróðir og munum halda merkjum DIMMU hátt á lofti!