Skálmöld söluhæstir tvær vikur í röð

Víkingarokkssveitin Skálmöld situr nú í toppsæti Tónlistans aðra vikuna í röð með plötu sína Baldur. Þetta telst að mörgu leyti óvenjulegt, yfirleitt eiga harðar rokksveitir á borð við Skálmöld ekki upp á pallborðið hjá almenningi en blómstra frekar í einangruðum kreðsum tónlistarinnar. Þá er sú staðreynd að sveitin hefur litla sem enga spilun fengið í útvarpi og ekki átt sæti á neinum vinsældarlistum, mjög sérstök í ljósi þessa. Platan, sem kom út um miðjan desember, hefur hægt og rólega fikrað sig upp sölulista landsins og setið í toppsætum víða undanfarnar vikur, til dæmis á Gogoyoko og Tónlist.is.

Skálmöld leitaði til fjölda íslenskra útgáfufyrirtækja vegna útgáfu Baldurs en talaði víðast fyrir daufum eyrum. Svo fór að færeyska útgáfufyrirtækið Tutl tók sveitina upp á sína arma og hafði veg og vanda að útgáfunni. Sveitin hefur nú þegar verið bókuð á nokkrar tónlistarhátíðir í sumar, bæði heima og erlendis.

Síðustu fréttir af Skálmöld eru þær að sveitarliðar hafa staðfest að vera í viðræðum við stórt útgáfufyrirtæki erlendis um mögulega útgáfu Baldurs á heimsvísu. Meira fæst ekki uppgefið en vonandi er þess ekki langt að bíða að fréttir berist af þeim vettvangi.

Skildu eftir svar